Year Planner-a um angin hung tlung ding August 3-9, 2026 sung hi Music Week 2026 ei hmang hun ding a lo ni nawk taa, AMB committee chun subject ziektu ding ruotin, subject siema um ennawn nawkin, Presbytery/Field/City Church Musical Board member hai po po hmu dingin ei hung thawn a nih.
Tuhin thla chanve vel char a um taa, inhmataka ei hung thawn theinaw na thua in hrietthiemna ei inngen. Lekha inthawn vela an hnu ta leia harsatna hmun hai chu a um el ta dim ei hriet nawa, a lo um a ni chun inhrietthiemna ka ngen nghal bawk cheu. Guidelines siema um hi subject latu hai thangpuitu ding chaua buotsai a nih. Headquarter anthawkin a lekhabua hung thawn ani naw ding leiin ei Presbytery/Field/City Church Musical Board in mani biel sunga Local/Unit hai chan ding chu a tul dan le pawimaw dan izira thawndar dan ding hma mi lo la pek seng dingin Pathien hmingin ka ngen cheu.
Local Music Committee member hai chu Local Kohrana department po po a huom a nih ti hrezingin subject bua khawm zieklangin a uma, Music Week program siem hunah department po po thang ngei dan dinga hma la ngei dingin ei in ngen a nih. Chubaka, Presbytery/Field/City Church Musical Board in music week chungchang lekha a thawndar el khela a rem thei ani chun Local Committee khawma an hrietpui ve ngei na dingin a rem ani chun PS/FS fethleng khawma Local Kohran hai ta ding lekha thawndar dan ngaituo sa ni bawk sien.
Music Week chungchanga indawn sap nuom ei um chun Chairman/Secretary iengtiklai khawma biekrawn thei zing kan nih. Pathien malsawmna tamtak dawnga Music Week 2026 hmang seng dingin ka ditsak cheu.
Assembly Musical Board
