2026 KUM THUPUI / Pathien Chibai Bûk
Kum thupui ‘Pathien Chibai Bûk (Jn. 4:24)’ hi September Beiruol sûng inchûkna le hrilzâuna nei ning a tih. Suizauna lekhabu PDF download thei a nih.
BUOTSAITU THUHMA
Kum 2025 Midterm Executive Council chun kum 2026 thupui dingin “Pathien Chibai Bûk” (Johan 4:24) ni sien tiin a thlang a. Chu dungzui chun Ministry Board chun suizâuna ziektu dingin Rev. H.P Runremthang, Evangelist-at-Large a ruot a; enpuitu dingin Rev. Dr. James R. Ruolngul a ruot bawk a. Rawngbâwlna sin tamtak thaw zing pumin, hun tâwite sûngin a bua hmu thei dinga a hung buotsai hi lâwmum ei ti takzet a, a ziektu Rev. H.P Runremthang EAL chungah lâwmthu ei hril a nih.
‘Pathien Chibai Bûk’ ti lekhabu hi ei ṭawnga tiem ding a tam naw khawp el a; hi lekhabu chite ni sien khawm, kohranhai ta dinga ṭangkai tak le malsâwmna intluntu a ni ngêi ei beisei a nih. Kum 2026 September Beiruola hmang nghâl ding a ni leiin a ni (tarik) hai khawm awlsam taka hriet el thei dinga inchuon nghâl a nih. Chun, tuva ṭum hin chu beiruol laia hriltlângna ei nei hlak kha zân hran lieuin ‘hriltlâng zân’ siem a nih. Chun, a tâwp tieng taka hin Biekin Inkhâwm huna ṭawngbau mawi le ṭha lema ngaihai thurâwn zieksa a ni bawk a; hienghai khawm hi kohranhaiin zâwm ve pei inla nuom a um takzet a nih.
Kum tinin September beiruola hin beiruol thaphût/thawlâwm ei nei hlak a. Hieng sumhai hi ei lo hriet ta angin, thlarau tienga insukhrâtna ding (spiritual nuture) hieng: crusade/camp/retreat le seminar a hai hin ei hmang hlak a ni kha. Chuleiin, ei lo thaw hrim ta ang khan, kohranhaiin ṭhahnemngai taka ṭhang hung la seng dingin Pathien hmingin ei inngên takzet a nih.
Kohran sûnga lekhabu insuona kawnga hma latutak Christian Literature & Publication Committee (CL&PC) haiin a thuziek le lekhabu hmêlhmang mawi taka an mi suopêk hi lawmum ei ti takzet bawk a nih.
Ei kum thupui ‘Pathien Chibai Bûk’ ti hmang hin kohranhaiin Pathien malsâwmna tamtak ei dawng ngei ei beisei a. Thlarau le ti tak tak le lungril po poa Pathien chibai bûk a, Ama inpâk a, ei chawimawi theina dingin Lalpa Pathienin hi lekhabu hi malsâwm mawl raw se. Suk suol pal le ziek suol pal dâm, ziek ding âwm tak ziek sa lo a lo um a ni khawma, kohranhai hrietthiemna ei inngên nghâl bawk a nih.
Rev. Lalrohlu
Secretary Ministries
Independent Church of India
Sielmat, Churachandpur, Manipur
5th November, 2025
