Manipur Simthlang biela Chanchin Ṭha hung phurlûttu Watkin R. Roberts-in Senvawnah rawngbâwlna hung ṭanin ringtu an hung um a, chutaka inthawk chun khaw danga khawm an hung um pei khan hming nei khawp hiel ringtu an hung um pei khan a mission hming dingin “Thado-Kuki Pioneer Mission” tia inbûk a hung ni a. Amiruokchu, ringtu khaw dang dang le hnam dang dang lai khawm an hung um pei khan a mission hming hin huop zovin a hriet ta naw leiin kum tlawmte hnunga chun a mission hming dingin “North East India General Mission” (NEIGM) tiin a hung thlâk nâwk a nih.
Missionary Watkin R. Roberts innghatna le a thupuitak chu “Manya Enkol” a ni a. Ama hi tu kohran itir khawm a ni naw a, Pastor a ni naw a, mani sum sêngin a hung a, mani ngei hungin rawng a bâwl ṭan a nih. Kristien an hung pung pei a, Wales tieng le America tieng khawm mi tamtakin an hung inhnikpui leiin sap missionary dang dang khawm an hung tir lût sa ta pei tah a. Kum tam fe hman lovin Watkin R. Roberts chun a mission chu chang phâk ta lovin mi dangin hotu nina an hung chang lem el tah a. Ama chu ringhlaa umin Manipur sunga um chen khawm sawrkarin a khap pêk ta el a. Amiruokchu, ringtu Kristienhai lai chun ama lungril ang putin “Mania Inenkawl” ti hi a man phâk iemani zât an um hman ta leiin ama zuituhai chu kohran member lai 4892 lai an um leiin anni chun ama an zui tlat a, chuongchun inṭhena a hung um ta a nih.
Watkin R. Roberts a zuituhai chun an kohran hmingah iem an inbûk ding a na ti ngaituoin an hotu Lalnghinglo le Taisena rawiin Pherzawl khuo ah April 1, 1930 in inkhawmpui an hmang a. Chu ṭum chun ṭawngṭaina le nasataka an ngaituo hnungin Taisena lungrila Pathienin a hung pêk, “Independent Church” ti chu suknghet a nih.
Sawrkarin biekin bâwl a phal nawh a, thawlâwm thaw khawm phal lo, thawktu ruoi phal lo tihai le dân khir takin a khuop a. Amiruokchu, Pathien thu chu khuopin a um thei naw leiin kum 1932 a inthawkin biekin an bâwl ṭan sup sup ta a nih. Harsatna tamtak nêrthlengin hun a liem pei a. 1961 khan “Independent Church of India” tiin sawrkarah zieklûtin a um ta a nih.
Independent Church hming put ṭanni hi ICI Executive Committee chun kum 1980-a ICI Golden Jubilee lâwmna le inzawma Kohran mipui lo hriet dinga lekha an suo a chun Independent Kohran hming put ṭanna ni April 5, 1930 tiin an ziek a. Amiruokchu, 1985-a Gospel Diamond Jubilee lâwmna le inzawma Souvenir-a chun April 4, 1930 hi Independent Kohran hming put ṭanna ni angin a ziek a. Sui feltu dinga ruothaiin an hung sui chieng dungzuiin 2019-a General Assembly 70-na thurêl 8-na chun April 4 hi suknghet a lo ni tah a nih. Hi ni hi Niser Pawimawhai laia belsain General Assembly 71-na chun Independent Kohran hming put ṭan ni April 4 hi Ṭawngṭai Ni (Day of Prayer)-a kum tina hmang dingin a lo rêl tah a nih.
Hmang dân ding:
1. Ursûn thei angtaka hmang dingin Local Committee-in program siem a tih.
2. Hi ni hi ICI kohran hnuoia office le institutionhai chun holiday-in an hmang ding a nih.
3. A thei chun bungheia ṭawngṭaina neiin Kohran chanchin hrilna le Pathien thu hrilna nei ding a nih.
4. Ṭawngṭaina subject ding chu Headquarters-a inthawka hung bâkah biel tin le khawtinin a ṭûl anga siem belsa nîng a tih.
5. Thawlâwm dâwl ni hlak a ta, dawl suok ang ang chu General Headquarters a thawn ding a nih.
Bible châng tiem dinga ṭhahai:
1. Kohran chu Krista, (ama ngei) lungpui chunga innghat a nih (Mt. 16:18-19).
2. Kohran chu Krista thisena inchâwk a nih (Thil. 20:28).
3. Kohran chu Krista taksa a nih (Ephesi 4:12-16).
(Source: ICI Ministry Manual – 2022 Edition)
