Neh. 13
Nehemia Jerusalem kul bawl dinga a fe khan “Horon mi Sanbalat le Ammon mi siehlaw Tobia le Arab mi Gesem” (Neh. 2:19) hai chun nasatakin an lo chawkbuoi a. Pathien ta dinga nasataka hmalatu a ni leiin, Nehemia chun an suol thaw chu hre zingin a kul bawl chu a sunzawm zing a, “ni sawmnga le ni hniah” (Neh. 6:15) kul chu an bawl zo el a. An bawl zo hnung chun Nehemia chu Babulon tieng kum 12 zet a va um a. Chu hnunga chun lal Artezerzia phalna lain, Jerusalem chu a va fe nawk a (Neh. 13:6).
Kum 12 a um naw sung chun Judahai chun Jerusalema Pathien an lo biek dan chu a lo mumal ta naw hle. An thiempu Eliasab chun Tobia (Jerusalem kul an bawl laia chawkbuoitu kha) le a sunghai chu Jerusalema Pathien ina chun hmun tha a lo pek a; “Kha hmaa Levi mihai, hlasaktuhai, kawtkhar vengtuhai chanvo, beiphit thilinhlan dam, riminhnik dam, bur le belhai, bu sawma pakhat dam, uoin le hriek le thiempuhai ta ding a thena then thilinhlanhai an siena hlak pindan lientak Tobia ta ding chun a buotsai pek a” (Neh. 13:5) tiin.
Hi lei hin “Levi mihai chu chanvo pek an ni naw leiin Levi mihai le hlasaktuhai chu mani lo tieng sengah an tlandar ta” (Neh. 13:10) a.
Eliasab thil lo thaw hi a pawi hle. Deuteronomy 23:3 a chun, “Ammon mihai le Moab mihai chu LALPA mihai pungkhawmhai lai chun an ṭhang ding a ni nawh” ti kha a bawsiet a nih. Chu el bakah, Jerusalem kul bawlṭhat laia chawkbuoitu tak, hmun ṭha peka a lo um hin suol lien tak a lo thaw a nih. Levi mihai, an umna hmunah um thei ta loin lo tieng an lo fe pha bawk.
Hi lei hin Nehemia a hung kir hin, “anni chawkpawltu mipuihai chu an suktum” nghal el a. Chuongchun, Nehemia chun a hala, “Ieng dinga Pathien in hi thlathlam a ni zing el am a ni leh?” (Neh. 13:11) tiin a ko khawm a, an hmun sengah an um tir nawk a.
Hi chanchina inthawk hin, vawisuna kohranhai hin, ei Pathien ina hin tu am ei sie chunghnungin ei ngaipawimawa ti hi hang indawnin hang ngaituo inla nuom a um hle.
Pathien ei biekna le Pathien ei zuinaa hin, Pathien le inrem thei lo thil ieng ieng am ei lak lutin, ei kawl hlak a? Vawisuna mimal, insung, kohran, khawtlang le hnama chen khawm hin Pathienin ṭhang ve lo dinga a ti ieng ieng am ei kawlṭha ta ding maw? Chu kawnga chun, Pathien in enkawltu le Pathienin um dinga a tihai ieng ieng am ei hnawt hmang ding ti khawm ngaituo sa thei ni bawk a tih.
Sanbalat le Tobia hai ang hin ei rawngbawlnaah hmun an chawng rawn taluo chun hma sawn thei ngai nawng ei tih. Chu nek chun, ei rawngbawlna hluotu ni rawp lem an tih.
Pathien thu neka khawvel ropuina dam, hausakna dam, hmingthangna dam hin hmun pawimaw an chang zing el chun Pathien chu iengtin am ropui a ta?
Suol inchalrempuina hi ei ṭhangmawbawk lien tak a ni tah a, la ni pei bawk dingin an lang a nih.
Hi lei hin, Nehemia ang hin, Pathien in thlathlama um ta hi siemṭha nawk ei ta, insukthienghlimin, dehawn dinghai dehawnin, Pathien le a thu mawl hi hmun pawimawah sieng ei tiu.
-Rev Dr. James R. Ruolngul
