(i) Thlipui le tuifâwn a hal re (Mt. 8:23-27)
Lungrila ṭha ti le “ni thei sienla âw!” tiin duthusam ei nei hlak. A sukpuitlingna dingin iem ei thaw hlak a? Biek ṭhat dâm, tlawn dâmin ei nuom zâwng le ditzâwng thil hai chu a tak inchangtirin ei tum hlak. Isu khawm hin thaw nuom a nei a nih. Amiruokchu, iengkim thawthei Pathienin a lungrila ṭha a ti le thaw a nuom hai a thaw dân le mihriem le a thilsiemhai thaw dân chu an ang teu teu nawh. Hnuoi chu vân chunga um a ni ang bawk in Pathien chu a chunghnungtakah chun a um zing a, um kumkhuo bawk a tih. Tukhawmin an inthaw lui tir thei nawha, hi zân khawm hin thawluina ni loin ama thu, a lungril nuom dân ngeiin thil a thaw a nih. Ringnawtuhai le ringhlatuhaiin Pathien thilthawtheina cho zâwngin hieng ṭawngkam an hmang hlak – Misuolhai sukhlum theia um a ni chun iengkim thawthei Pathien a ni naw a nêl chu teh! ti hai ang dâm hi ‘iengkimthawthei chu iem a na?’ ti umzie an hriet naw lei a ni lem. A thi nuoma a thi a nih, ka thi nuom a nih ie tin tukhawm a biekthlêk naw hrim hrim. Tu kuoma khawm thi phalna a lâk a ṭul nawh. Hmangaina leiin misuol aia thi a nuom êm êm a, thi thei naw sien a nuom khawm thaw theilo Pathien, iengkim thawtheilo a ni lem ding a nih.
Hi zân khawm hin a lungril hin thlipui lungsen chu to sien, um ṭawk ṭawk sien ti a nuom a nih. Biek ṭhat le biek thlêk amanih, tlawn lungâwi a thaw le! Chun, a thaw khawm a ngai naw hrim a nih. Leilung dân chunga thuneitu a nih ti inlangtir pawi a ti naw a ni hmêl. Thli chu a hal a, a ti chuh! Iengah a va ngai naw char char ngei! Nuom sien chu hal kang tawp thei khawm a nih. Nuom sien chu chatuona dingin hal bo hmak thei khawm a nih. Tum ei hal hlak a? Ei thuhnuoia um hai ei hal hlak. Ei chunga mi hai chu ei lungril naw anga thil a lo um pal a ni khawmin hni an naw le ei insêl pui hlak. Hal hi thlipui hin a ngâithei naw khawp el a, chuleiin, nasatak le rapthlâktak a hung inhrosa in a hung thaw lêt a. Nasatakin an inbeituoa, a tâwp a tâwpa chu Isûn hnêna a chang a ti khawm a ni le! A hmabula chu ṭît khawm a ti ngam nawh. Matthai ziek lem chun, “a hung rê ta duok el a,” (Mt. 8:26) tiin a mi hril a nih. Chun, um dân dinga um lo hai ei hal hlak bawk. Hi zâna thlipui le tuipui hai khawm hi an khawsak dân dinga khawsa lo, Setan a inthawk an ni hmêl. Chu chu Isûn an chunga um, thuneitu lal a ni zie târlangna dingin a hal rê hmak a nih. “Nang chun tuipui so bur bur chunga khawm ro i rêl hlak a, A tuifâwn invâwr sâng pha khawm i sukrêhlak,” (Sam 89:9).
(ii) Natna a hal re (Lk. 4:38-39)
Bible-a hin Isu kuta sukdamna chang mi tamtak ei hmuh a, damna an chang dân ruok chu an ang seng nawh. A puon hmawr chau tâwka damna chang an um a (Mk. 5:21-34), pilpâwk hmanga a sukdam an um bawk (Jn. 9:1-7). Kâr hlataka inthawk dâmin a hei sukdam a (Mt. 8:5-13), an taksa ngei them khawm in a sukdam a (Mk. 5:41), chun, “Ka nuom ie, lo inthieng ta rawh,” tiin ṭawngkam innêm tak khawmin a sukdam bawk (Mt. 8:3). Amiruokchu, nâtna chu hal khawmin a hal dam a nih.
Peter tarpinu sukdamna chanchin hi gospel pathumhai hin an ziek senga, an rênga an hril seng chu Isu pindanaha lût a, a khawsik chu a bo nghâl a nih ti chu a nih. Amiruokchu, iengtinam a sukdam a? Matthai chun, “a kut chu a them pêk a, a khawsik chu a bo tah a,” a ta (Mt. 8:15); Matthai nêka chipchier met in Marka chun, “a kut a va chel a, a keitho tah a. Chuongchun, a khawsik chu a bo tah a,” a ti nâwk a (Mk. 1:31). Luka ruok chun, “a kâwlah a ngir a, khawsik chu a hal a, a bo tah a,” tin a hril a nih (Lk. 4:39). Iengkim chunga thuneitu, Laltak a ni leiin a nuom dân dânin iengkim hi a hêm kuol el a nih. Hi ṭum hin a thuneina le thilthawtheina ti chau naw chu thil dâng iengkhawm a hmang nawh. Pa Pathien kuomah a ngên pêk khawm an nawh, nâtna chu a biek a, a rê tawp el a nih. A hala, a bo tawp el a nih. Ieng lei am a na? Isu chu damnaw chitinêng, natna chitinênghai chunga Lal, nâtna chunga Lal a ni lei a nih.
Khawvêla hin natna chi tum tum sing hni vêl a um niin World Health Organization (WHO) chun a mi târlang pêk a. Hieng nâtnahai hi inchûk chienga, enkawl, sukdam le sukbo tumin damdawi, damdawiin, doctor, nurse, scientist le suimihaiin thei tâwp suoin ṭhang an lâk zing. Amiruokchu, Sukdamtu Isu ṭhang loin damna um ngai naw nih a, nâtnahai chunga Laltak Krista ṭhang lo chun sukbo ni ngâi bawk naw nih.
(iii) Khawhrihai a hnawt dawk (Mt. 8:28-34; Lk. 8:26ff)
Setan peithlaka a um khan (Jn. 8:44; Lk. 10:18), vâna vântirkohai chu hmun thuma ṭhea hmun khat ama ruolin peithlak an ni ve niin an lang (Tp. 12:4). Chuonghai laia a ṭhen chu rorêlna nghâkin tuhin khuopin an um mêk a (1 Kor. 6:3; 2 Pet. 2:4; Juda 1:6), a ṭhen ruok chu tiem chin nei a suk zalên an la ni hri a nih. Hienga zalên pâwlhai hi an nih khawhri ei ti hai chu (Mk. 5:9, 15; Lk. 8:30; 1 Tim. 4:1). Bible chun, “khawhri inthiengnawhai” (Mt. 10:1), “thlarau khelinhlip” (1 Lal. 22:23), “Drakon lientak, Rûlpui tar, Diebol le Setan…a tirkohai” (Tp. 12:9) tiin a hril a. An sin ropuitak chu, “awi nawhai mit sukdel” (2 Kor. 4:4), inchûktirna indiknaw the lâr (1 Tim. 4:1), ringtuhai suknat (2 Kor. 12:7; 1 Pet. 5:8), vântirko thienghlimhai indopui (Tp. 12:4-9) a nih. Mi an sukna thei a (Mt. 9:32-33; Mk. 6:13), mihriem le rannung sûnga khawm lûtin an sawisak thei bawk (Lk. 8:27,30; 11:24-26). Hieng ang khawp a suol le thilthawthei ni hai sienkhawm Lalpa Isu hmaa ruok chun ṭiin, “an inthin hlak a nih,” (Jak. 2:19). Chuleiin, Isu chun thu a pêka, um ro a tina na an uma, fe ro a tina na an fe el a nih. A thupêk chu an zâwm naw ngam nawh. Isu chu tu am a na ti chu an hriet leiin, “Pathien Nâupa, nang le keini ieng am ei inzâwlna?” (Mt. 8:29); “Nang ka hriet che, Pathien Mi Inthieng i nih,” (Lk. 4:34) an ta. Chun, an ṭi thei êm êm a, an tâwpna ding chu tuorna rapthlâktak ding a nih ti khawm an hriet a nih: “‘A hun tlung hmain a mi sawisa dinga hitaka hung am i nih?’ tiin an khêk a.” (Mt. 8:29b).
Khawvêla Isu a hung san tak chu “Diebol sinthawhai sukbohmang” ding ti a nih. (1 Jn. 3:8). Chu chun khawhrihai lalram khawm hi a ṭhangsa a nih (Mt. 12:25-29; Lk. 11:17-22; Jn. 12:31; 1 Jn. 3:8). Isu chu khawrihai chunga leng, an chunga thuneina insângtak neitu a ni leiin hi hnuoia ngei khawm hin a hmabula chun an chang ngam nawh. Hun la hung tlung dinga khawm Setan râwihai an na, iengkima an thlawp leiin rorêlna ṭiumtak el chu an la hmasuon ding a nih (Mt. 25:41; Tp. 20:10).