(i) Piengtharnawhai Krista lalna hnuoiah an intuklût thei nawh (Rom 8:7-8)
Isu Krista chu Pathien a nih ti chu hre in pawm hai sienlakhawm piengthar lohai chu Isu inlalna hnuoia an intuklût thei nawh. An bauin, “Lal Isu” ti de hlakhai sienkhawm ringnawtu chu Krista ta dingin an pumpêk thei nawh. Hienga ei hril umzie tak chu Isu ditdân chu ringnawtu hringnuna rorêltu an nawh; Isu thu zâwm, suklâwm, inza le chawimawi chu an hringnun thiltum lien tak, an lungril po po fena a ni nawh ei tina a nih. An thlarau ngirhmun a la fel naw leiin an lungril rûk taka um chu, “…a râwl ka ngai ding LALPA chu tum a na?” (Ex. 5:2), an naw leh, “Hi mipa hi kan lal dingin kan dit nawh,” (Lk. 19:14) ti hai hi a nih. Sakhuo puithuna tinrenga inbelin puotieng inlang mawi hlak hai sien khawm an hringnun pumhlum ṭhuoitu tak chu, “Keinia inthawkin fe hmang rawh, I lampuihai hrietna chu kan châk naw a nih…” Iengkimthawthei chu tu am a ni leh, a rawng ei bâwl ding chu?” ti hi a nih (Job 21:14-15) An nungchang khawmin, “Ei lei hin hnêng ei ta, ei hmurhai hi eini ta ngei a ni annawm, tu am ie ei chunga lala um chu?” an ti hlak,” (Sam 12:4) Krista thuhnuoia intuklûta kûn nêkin misuol ringnawtuhai chu, an reng in mani lampui senga an pêta (Isa. 53:6), mani ta ding seng in an hring lem hlak a nih.
Chuleiin, ringnawtu chu Krista Lalna thuhnuoia an pêk thei hlawl naw a nih. “Tisa ditzâwng chu Pathien dona a ni si a. Chu chu Pathien dânin a um nghal si naw a, um khawm a um thei bawk nawh. Chuleiin, tisa ditzâwnga umhai chun Pathien an suklâwm thei nawh.” (Rom. 8:7-8). Mi an pumpêka, thu khawm a zâwm ding chun sandam a ni hmasa phawt a ngai a nih. Sandam nauhai hi an nih an puma inpe ding hai chu. Misuol ringnawtu ruok chun a ring ding a na, chu ringna chun hringna thar (sandamna) inneitir a ta, hringna thar chun hringnun thar (Krista inlalna hnuoia intuklût nuomna le theina) a hung inneitir ding chau a nih.
(ii) Krista thu hnuoia intuklûtna hin a mi sandam thei nawh (Tt. 16:30-31; Eph. 2:8-10)
Min “sandama ka um theina dingin iem ka thaw ding?” tin indawn hai sien la che, ieng ang dawnna am pêng i ta? Chanchinṭha indik taka hretu i ni chun, “Isu Krista ring la sandamin um i ti,” tiin dawn ngei i tih. Hienga dawnna hi Bible thutaka an nghatna hmun tam taka hmu ding a um, entirna dingin: Johan 3:15-16; 5:24; 6:35; 6:47; 11:25-26; 20:31; Thilthawhai 16:31. An le, ei Lalpa Isu Krista, ei ni nêka gospel hre chieng lemtu ni siin iengleia tlangvâl mihausa chatuon hringna zawngtu kuoma khan, “Kei hi mi ring la chuongchun chatuon hringna chu nei i tih,” ti lova “hringnaa lût i nuom chun thûpêkhai chu zâwm rawh,” (Mt. 19:17) a ti pêk am a na? Hieng ang thoa ei Lalpa inchûktirna hi Luka 10:25-28 khawm hin ei hmu a nih. Lordship Salvation inchûktirna zuituhai chun hi lai thu hi an lâk ursun khawp el. Dân zâwm le intuklûtna chu sandamna dinga ṭul le pawimaw a ni ngei a nih ti sukchiengna dingin hi lai thu hi an hmang hlak. Amiruokchu, an inbiekna thu hi, a hnung le hma uluk taka ei en chun, thupêkhai zâwma insandam dingin a ti pêk nawh ti hriet thei a nih.
Tlangvâlpa Isu kuoma a hung hin, dânhai chu zâwma chel zingtu, miṭha tak anga inngai a nih (Mt. 19:20). Dân bawsetua an ngai nawh. Chuleiin, ei Lalpa chun sandamna lampui la zuk hril el nêkin dân bawsetu, sandam ngai, misuol a ni zie chu inhriettir a tum phawt a nih. Dân chun suol a mi tarlang pêk a (Rom 3:20; 7:7); suol a suktho a (Rom 7:5,9); suol thiemnaw an changtir bawk a nih (Rom 7:9-11,13 cf. , 1 Kor. 15:56). Chun, “Dân chu ân thieng a, thupêk khawm chu an thieng a nih, a fel a, a ṭha a nih,” (Rom 7:12). Amiruokchu, Dân chun a mi sukthienghlim thei nawh a, mi felin a mi siem thei nawh a, mi ṭha khawmin a mi siem thei bawk nawh (Rom 6). Dârthlalang chun i hmâia bal an hmu tir che a, chun, insâwpfai dingin tuikhura ṭhuoi bawk a ti che, amiruokchu, a sukfai thei naw che. Chuong ang bawkin, mi tukhawmin, misuol sandam ngai ka nih ti an hriet phawt naw chun Sandamtu zâwng ngai naw nih. Nisienlakhawm, misuolin Sandamtu chu ringnaa a pân pha le, Kristaa chun dân chu amaah sukpuitlingin a um lem hlak a nih.
(iii) Sandamna le râ insuo (Mt. 13:23; Jn. 15:2,8)
Sandamna min nei tir tu chu ringna chau hi a na, chun, Krista inlalna hnuoia intuklûta thlarau râhai min nei tirtu khawm ringna bawk hi a nih. Amiruokchu, ringtuhai hin râ inchen lo tak tak an nei thei ngei a nih ti chu Mt. 13:23 a hin chieng tak a hmu thei in a um: “Chun, leihnuoi ṭha chunga the chu, thu chu hre a, a ngaina hre bawk hi a nih. Chu chu a râ ngêi a, ṭhenkhat a let zâ damin, ṭhenkhat a let sâwmruk damin, ṭhenkhat a let sâwmthum damin a pung hlak,” a ta.” A lêt zaa ra insuo ringtu le a let sâwmthuma râ insuo tuhai kar chu hla tak el a nih. Grêp hrui tak tak Isu chun ringtuhai chu “râ tam nâwk zuol” dingin le (Jn. 15:2) “tam taka râ” (Jn. 15:8) (‘more fruit’ le ‘much fruit’) ding in a dit a nih. Amiruokchu, ringtu ṭhenkhat, an sandamtu Isu thuhnuoia an inpêklût tâwk naw a, Isua an um zing naw lei in mi danghai nêk in an râ tlâwm lem hlak a lo nih (1 Jn. 2:28).
Hi lai chungchang thua hin ngaidân khingbai deu deu pahni a um a. Bichieng met naw lem chun zuk “Amen” el thei chi nin an in lang. Chuonghai chu Lordship salvation le Free Grace an nih. Lordship salvation hai inchûktir dân chun piengthar indik tak chu Isu inlalna hnuoia intuklût a ta, râ an suo ngêi ngêi ding a nih, ra an suo naw chun a piengthar naw ti na a nel ti a nih. Hi ringdan thlawptu Ryrie chun, “Khawlai hmun a manih, ieng hun amanih, iengti khawng amani bek in ringtu taphawt chun thlarau ra an suo ngei ding a nih. Mi piengthar chun ra insuo ngei ngei a ta. An suo naw a ni chun ringna bo, ringnaa a um naw ti na a na, chuleiin, sandamna chang lo a nih,” tin a lekhabu So Great Salvation, phêk 45-46 ah a ziek a nih. Free Grace hai ruok chun sandamna le thlarau rahai hin inzawmna iengkhawm a nei naw ti chu an inchuktir dan a nih. Chuleiin, râ nei dêr lo chu piengthar lo a sie tawp el inchûktirna le râ le piengtharna iengkhawm inzawmna nei der loa ring dânhai hi inchûktirna puitling lo, thu tak pumhlum tling phak lo ni in an in lang.
Ra (thienghlimna, thilṭha thaw) hi pawimaw êm êm sienkhawm sandamna le inzawma ei hril pha chu a fîmkhur thei patâwpa ei ngaituoa ei hril a ngai a nih. Tlûkna hi ngêi ngêia um ding ti na chu a ni naw a chu a um thei a nih. Piengtharna ṭha tak nei mi khawm tisa mi tak in a la khawsa thei bawk. Amiruokchu, insira sima Pathien kuoma a kir in a suolhai an phuong chun ngaidam ning a ta, Pathien le inpâwlna (fellowship) chu suk thar in um a ta, a sandam hlimna a nei nâwk hlak ding a nih. Hi lai thu tak le inzawma ei ngaituo chet chet ding chu-suol inphuongna hun nei hman lo in ringtu lo thi ta sien iem chang tâng a ta ti hi a nih. Lal Solomon in pathien danghai tieng nghaa LALPA a lungrila a uiretsan lai tak khan thi sien iem ning a ta? Peter khawm a ṭap ngâwi ngâwi hma khan lo thi ta sien te? Inruithei thila an âwk sûng overdose in amani mi kuta mani lo thi ta sien? Motor accident a dam thi thut el ta sien? Lungphu châwl dam in thi thut el ta sien iem chang tâng a ta? Ei mâksan el thei naw ding thu dik chu mi piengthar indik tak khawm suola a la tlu thei a nih ti hi a na. Chun, tlu sien khawm tho nâwk a tih ti chu an dik bawk a nih. An leh, tho nâwk hman ta lo in thi sien a sandamna chu iem chang tâng a ta? A tho hman ta naw leia a bohmang sawng ding a ni chun a ring naw lei ni loin suol thupha a chawi naw lei a ni ding a nih. Chuong a ni chun sandamna hi a bo thei, thil ṭha thawa an nghat ti na ning a tih. An naw le piengtharna indik tak a lo la nei naw a nih ei ti el ding ning a ti?
Hi le in zawma ei theinghil lo ding chu mi piengthar ta hnung suola a tlûkna hin Pathien le inpâwlna chau a nih a tâwk siet, inlâichînna (sandamna) a tâwk buoi nawh. Chu, um zie chu Lal David uiretna suola a tlûk lai tak khan suol insir le sima inphuong hman loin lo thi ta ang sien khawm a chan ding chu lâwmman a nih sandamna an nawh. Pathien le inpâwlna sie ta hnung siem ṭha hman loa thi hi vânram chânna an nawh. Hieng ang hi Lordship salvation pawmtuhai chun piengthar lo a an sie tawp el a nih. Amiruokchu, Bible ei bi chet chet chun piengtharna tha tak nei hai ta ding khawm in suola tlûkna hi a la um thei a nih ti chu chieng tak in ei hmu. Piengthar a ni ti zuk hriet thei na ding iengkhawm um loin ringnawtuhai ang in tisa mi êm êm khawm in hringnun iemani chen chen chu an um thei a nih. A tlûk hun sûng taksa thina tuok naw nih a atho nâwk ngêi ngêi ding a nih. A tho nâwk hmaa a lo thi a ni chun lo la piengthar naw tina ni el a tih zuk ti bur el ding chun Biblea thangsan ding um in an lang nawh.
Lordship salvationhai hin ringna le thilthaw (râ) hai hi the hran theilo a nih an ti na a nih. Pakhat a um chun a pakhat lem khawm ngêi ngêi a um ding nin an ring a nih. Amiruokchu, sandamna min nei tir tu ringna (saving faith) le thil thaw (râ) hai hi thil pakhat an ni nawh a, sandam ei nina ding hin ra hi a ṭhang sa ve nawh. Ringna hi thilpêk (sandamna) ei lo dawng na kut a na, thil thaw iengkhawm ṭhang lo ringna khât baka sandam ei nih. Ringna le thil thaw ni loin ringna le iengkhawm um lo a sandam ei nih. Ringna indik inpiengthar tir tu chu a tak a ni le ni naw thil thaw a ei sukchieng ding a ni chun a ieng tak am ei hmang ding? A let za, a let sâwmruk, am a let sâwmthum? A ni ngei Mt. 13:23 hin “a râ ngei a” a ta. Chun, ṭhenkhat a let zâ damin, ṭhenkhat a lêt sâwmruk damin, ṭhenkhat a lêt sâwmthum damin, ṭhenkhat râ insuo der loin a ti naw lei in piengthar indik tak chun râ chu an suo ngei ding a nih ti chu a chieng tâwk hle. Amiruokchu, sandamna râhai hi in sandamna ding hmangruoa inchang tir nâwk hiel hi chu an dik thei nâwk si nawh a nih.
(iv) Krista inlalna thu hi ringnawtuhai kuomah ei hril sa ding a nih (2 Kor. 4:5; Tt. 2:36; 10:36)
Krista chanchinṭha hi ringnawtuhai kuoma ei hril pha, Lal angin ei hril ding am hmangaia Sandamtu angin ei hril lem ding? Biblea hin apostlehai chun Isu Krista kraws chanchin an hril thu ei hmu a. Iengtinam an hril a? “Mani thu kan hril si nawh a, Krista Isu chu Lalpa a ni kan hril lem hlak,” (2 Kor. 4:5) “Chuongchun, Isu in hemde ngei kha, Pathienin Lal le Krista ni fawmin a siem tah ti, Israel hnam tinin hre mawl raw hai se.” (Tt. 2:36) “Ama chun thlamuongna Chanchin Ṭha Isu Krista baua hrilin Israel thlahai kuomah thu an phur a, (Isu chu mi po po Lal a nih).” (Tt. 10:36) “I bauin, “Isu chu Lalpa a nih” tia i ṭan a, mithi laia inthawkin Pathienin a keitho ti i lungrila i ring phawt chun sandamin um i tih,” (Rom 10:9). Abikin Thilthawhai lekhabu a hin Kohran hmasahai chun chanchinṭha hi misuolhai kuomah Krista ring ding le an lalna hnuoia intuklût dinga kona in an hril hlak a nih. Isu Krista inlalna an thuhrilhaia an lak ursûn zie chu Thilthawhai lekhabu a hin chieng taka hmu thei dingin a um. “Sandamtu” ti thumal hi vawi hni char hmangin a uma (Tt. 5:31; 13:23), “Lal Isu” amanih “Lalpa Isu Krista” ti ruok chu vawi 92 lai hmangin a um nawk thung a nih. Chanchinṭha an hril chu iem a na? “Lalpa Isu chu ring la, chuongchun, sandamin um i tih,” ti hi a nih (Tt. 17:31).
Chuleiin, Chanchinṭha ei hril hunah a tling lovin ei hril ngai ding a ni nawh – Isu Krista chu Lal a nih. A. W. Tozer chun, “Krista chu ṭhea, an lalna ṭhangloa sandamtu ang chaua ring dinga hril chu inchûktirna indiklo le ṭium a nih. Mi tukhawmin Krista chu a chenve chau an naw leh, hmun thuma ṭhea hmun khat amanih a hmun thum lem amanih chau anga a nei thei ding a ni nawh,” tiin a hril. A thilthaw a chau ni loin Ama Isu Krista nina po pohai ringnaa sandam ei nih.
Dânnarânin, mi tukkawm a hung piengthar hlimin sawisel boin Krista kuomah an tuklût vawng nghâl ngai nawh. Inchûk suok ngai a nih. Amiruokchu, sandamna min nei tirtu ringna chun Sandamtu thuhnuoia intuklûtna ieng chena inthûk amani bek chu a min nei tir ding a nih ti chu Thuthlung Thar min chûktir dân a ni bawk a nih. Kohran hmasahaiin chanchin ṭha an lo hril dân hi khawvêl um sûng poa chanchinṭha enkawlna sin thawtu kohranin a hril dân ding chu a nih.