Heb. 11:13
Hebrai 11 hin ringnaa huoisenhai, Abel a inthawka tanin Abraham, Mosie le mi dang danghai chanchin a sui a. Hieng mi ringumhai hin thiltiema um chu an hriet a, an beiseia, nisienlakhawm an hmu nawh. Hnuoiah harsatna tamtak palhai sienkhawm thiltiem chu an chang der nawh (11:39). Chang nawhai sienkhawm, thiltiema umhai chu hlataka inthawkin an hmua, “chibai an lo buk ta a” (11:13) a ti a nih. Hnuoia hin chenghai sienkhawm, hnuoia an cheng hun sung hi mikhuol le khuolfe el an ni zie an hriet bawk a.
A umzie chu, hnuoia um nihai sienkhawm, thil tha lem an hmua, an hriet leiin, hnuoiah rinum an tuora, chu rinum chu an fethlenga, hma tieng an pan pei a nih. Chu thil tha lem chun, hnuoiah mikhuol le khuolcham el an ni zie a suklang leiin chu chu beiseiin an fe hram hram hlak a, beiseina chu hnuoi ropuina nekin a lien lem sih a. Hi lei hin a nih, “suknawmnat le vuokhai an tuor a… kawlbun le intangna ina khum dam an tuok bawk a, lunga dengin an um a, thingatnaa at bawngin an um a, thlemna an tuok a, kawlhnama sat hlumin an um a, beram vun le kel vun silin an invai a; rimsitakin, rinumtakin, suknawmnatin an um a” (11:36-37).
An ta ding chun khawvel hi umna tlak a ni nawh (11:38) a ti hi Abraham hai, Jakob hai chanchina inthawkin hnuoia an damlai nihai kha khuolfe an ni zie an hril anga, ram tha lem beiseia um an nih tina a nih (11:16).
Vawisuna eini khawm hi hnuoia khuolcham el ei nih ti hi ngaituo thar dingin dit a va um de. Ei cheng sawngna ding sawnin hun tawite sung hin ro ei inkhawl khawma, nasatakin ei inrim pui bawk a. Pastor Thangngurin, “Hmu le changtu khawmin an nei sawng nawh” a ti ang el khan, a dam sawng ding le nei sawng ding ruok chu ei um nawh. Anih, khawvel hi ei chengna le ei umna a ni leiin ei damna ding ei zawng ding chu a ni hrim a nih. Amiruokchu, chu ei zawngna chun, ei mikhuol nina le ei chatuon hmun le in ding hi ei lo theinghil hlak.
Vawisun hin a thar taka insiemthain, ei pan ram hi thlir nawn nawk hlak ei tiu.
-Rev. Dr. James R. Ruolngul
