Lalpa Isu chu Pa in a tir anga intlanna sin thaw dinga khawvela a um sung khan vawikhat chu Kapernaumah a lut a. Chutaka chun sipai za hotu pakhat a um a, ama chu Lalpa Isu kuomah chun a hung a, ama chun suok a nei a, a suokpa chu a zeng lei chun inah chun a zal zing a, sipai za hotu chun Lalpa Isu kuoma chun, “Ka naupang a zeng a, inah a zal zing a, nasatakin suknat in a um a nih,” tiin Lalpa Isu chu a ngen a. Lalpa chun, “ Hung ka ta, sukdam ka tih” tiin a hril a. Sipai za hotu chun a kuomah, “Ka insung I lutna tlak ani naw ie, thu chau hril la ka naupang chu dam el a tih,” a ti a.
Hi lai thu hi zuk ngaituoin sipai za hotu inngaitlawmna tawngbau suok hin lungril a hne em em elin ka hriet. Sipai hotu hi an in lal em em a, sipai hai le a suok kuomah khawm a nuom na na tir thei le inthawtir thei a ni thu ama ngeiin a hril Bibleah a ei hmu a, chuong anga thu nei le hotu nisienlakhawm, a nina chu a suong der nawh. Sipai tamtak chunga thu neitu le suok chen nei a ni thu a tawnbaua inthawk hin an hriet thei. A tawngbau hin lungril ava zuk tawk ngei de, ama chun Lalpa Isu chu Kapernaum a hung lut ti a hriet chun, Lalpa Isu kuomah chun fein a suok naupang zeng dam loa a zal zing chu hrilin, sukdam pek dingin a ngen a. Chu thu chu Lalpa Isu`n a hriet chun, a inah fea sukdam dingin sipai za hotu chun a hril a, nisienlakhawm, sipai za hotu chun, a in chu Lalpa Isu lutna tlak ni a a ngai naw leiin, tbhu chau hril sienkhawm a naupang chun damna hmu dingin a ring a nih.
Hi lai hunah hin Lalpa Isu chun damnawhai sukdamin, thilmakhai thaw sienkhawm, lekha ziektuhai, Pharisaihai le thiempu lalhai chun misuolhai ruolpa, bu hepa uoin hepa tiin an hnawl a, Judahai chun ama chu Krista a nih, tia a tantu chu inkhawmna inah hnawng dinga thu an sukthluksa ani leiin tu khawma Lalpa Isu chu an tan ngam nawh. Mitdelsa a pieng a sukdam khawmin, “Hi mipa hi Pathien kuomah inthawka suok ani naw chun iengkhawm thaw thei naw ni,” tia a tan leiin, Judahai chun an inkhawmna inah inthawk an hnawtdawk ti Pathien lekha thuin a mi hril a. Chuong khawp chun Judahai chun Lalpa Isu chu an hmusittin an theida a nih. Chuong lai zing chun sipai za hotu ruok chun, Lalpa Isu chu ngai ropuiin a insung khawm chu a lutna tlak nia a hriet naw ani chu!
Ani chun, sipai za hotu hin in a nei tha naw lei ni`ng a ti`m aw! Ti zuk ngaituoin ring a um theinaw, a san chu ama chu sipai tamtak chunga inlal le thu nei a na, suok khawm nei a nih. Chuleiin chengna in a nei that naw lei ni lo in, anngaitlawmna lei ti inla indiktak ring a um. Chuong ang khawpa thunei le mi inlal nisienlakhawm, Lalpa Isu chu hnuoi le van lal nau a nih ti a hriet chieng leiin, a ina fea a suok zeng leia zal zing khawm chu zu fe kher lo khawma thu chau hril sienkhawm a naupang chun damna hmu ngei dingin a ring a nih. Ringna hi a lo va nei tha ngei de aw. Chuleichun, a nih Lalpa Isu`n sipai za hotu anga ringna nei Israel lai khawm an umnaw a ti hiel chu.
Lalpa Isu ringna indiktaka ringtu hai chun, fel le tlinah an inhmu ngainaw a, tlaka an inngai ngainaw chu. Lalpa siehlaw Tirko Paula khawm Dan felnaa sawisel ding um lo le Pathien rama beiseina leia Juda dan a thahnem ngai leia ringtu Kristienhai suknawmna hiel khawpa thahnem a lo ngai khawm chun, Krista felna a hmu china chu , mi po po neka suol le tirko khawm ni tlaka an ngainaw hiel a nih. Mi thienghlimhai laia a chintak nek khawma chin lema an ngai a nih. A va zuk inngaitlawm ngei de aw! Pathienin ka ruolpa a ti hiel Abraham khawm chun, meivam ang chauin Pathien hmaa chun an ngai a nih.
Ka insung I lutna tlak ani nawh ti thua, eini tieng ei zuk lak lut ding le ei zuk ngaituo dinga tawitea ei zuk suklang nuom chu hi a nih. Ei Bible chun Pathien chengna in ei nih tiin a mi hril a, chu in chu anthieng a nih tiin a mi hril bawk a, unau dittak nang le kei hi te ieng ang am ei na ti hi ngaituo a va pawimaw de. Pathien Thlarau chengna ding chunk a ka va fitnaw de ti ka ngaituo pha chu inzakum hi ka ti naw thei nawh. Krista ringna lei chaua chengnaa a mi hmang a ni zie dam hi zuk ngaituo thar inla chu, Kristaa chun lawm naw ruol ding a lo ni nawh ti hi zuk hre thar inla ei hnuoi rinum tuor khawm hi a nep deu ring a um. Krista nina hrechiengtu Peter khawm ngamanaa Lalpa Isu thua len a deng chun nga tamtak a man chun a kuoma Lalpa um chu phuah an hriet naw leiin , “ Lalpa mi fesan raw, misuol ka nih,” a ti a, amiruokchu , misuolhai lama sandam dinga hung ani tlat leiin fesan nekin, “Mi zui rawh, mihriem mantuin siem ka ti che tiin a ko lem a nih. MIhrat naw le tlinloa inhrie le suol inti ngawi ngawihai chu Lalpan a hmusit ngai nawh a, an chunga a lunginsietna a suklang lem hlak a nih. Tha le fela inngaihai ruok chu a hlawsam rawp hlak. Pharisai le lekha ziektuhai le Thiempu lalhai chun Pathien lungawina khawpa fel le tlina an inngai leiin Pathien le an kar a hla a, misuol le tlinna neiloa in hrehaiin Pathien lunginsietna an dawng lem hlau hlak. I insung le ka insung Lalpa lutna tlaka ei ngai ve el am aw?
Lalpa`n malsawm raw seh. AMEN
Pu D. Kunga
Bible Hill, Rengkai
