(i) Krista Isu – Isu Krista (Phil. 2:5, 11)
“Isu Krista chu lal a nih” (lal Isu Krista) ti le, “Krista Isu chu lal a nih” ti hin danglamna a nei am? Isu ti hi Hebrai ṭawng YESHUA tia inthawka laksuok a na, a umzie chu “JEHOVA chu sandamtu a nih” tina a nih. Pathien Nâupa, Mari sûnga mihriema a hung insiengna, a khawvel hming a nih. Krista ti chu Pathien mi thlang, Messia, hrieknâl, thlang tina a na, hi hi a nina hming (title) a na, Pathien hrieknâl a nina hrilna hming a nih. Thuthlung Thar ziektu ṭhenkhatin a mihriem hming sie hmasain ISU KRISTA tiin an ziek a (Juda 1:1), ṭhenkhat ruok chun a Pathien mi thlang bik a nina ‘title’ hi sie hmasain KRISTA ISU tiin an ziek bawk (2 Tim 1:1). Hi lei hin mi tam takin an hriet buoi a, a umzie dang dai ni dinga ngâi dam an um hlak. Kristienna inṭan tir lai a inthawk ta khan ṭhenkhatin a mihriemna an hnâwl tawp naw leh an hril nêp lem a, ṭhenkhatin a Pathienna an lo hnâwl ta hlak hrim a nih. =awng kalphung ziek dân tamtaka chun an thil hril uor tum dân dungzuiin thumal, thuluong le ṭawngkam hai hi remkhawm a ni hlak a. Hebrai le Greekhai lem chun hieng ang a thil ziek hi an uor êm êm. Chuleiin, Isu Krista ti le Krista Isu tiha an remkhâwm dân izirin iem an sie chunghnung lem a, iem an hril uor lem a na ti hriet thei a nih. Philipi 2:5-ah Paula’n Krista Isu tiin a bul a ṭan a, chang 11-ah Isu Krista tiin a tâwp a khâr bawk a nih.
Paula hin Pathien mi thlang bik a nina ‘title’ a sie hmasa a, chu chun Pathien mihriema hung inchang a nih ti le, chu mihriem (Isu) Pathien (Krista) chu lal a nih ti thutak hi a phawrsuok hne hle a nih. Chun, a tâwp a khârna a khawm hin a mihriem nina a inthawka Pa kuoma a kir nâwk thu dâm, hnuoia inthawka vâna a lâwn nâwk thuhai hi a namnghet bawk a nih. Tirko danghai naw ang takin Paula hin Isu Krista nêkin Krista Isu ti hi a hmang rawp hlak, a san ni awm ding taka inlang chu mihriem tieng takin Lal Isu le khan an lengdûn naw khawm lo ning a tih. Kum iemani zât zet a hnungzuitu Johan chun a mihriemna a hrietchieng êm leiin Isu Krista ti ngawt in a ko ve thung. Ieng ti ang zâwng khawmin hril inla Isu chu Lal a niha, Messia a niha, Hrîeknâl a niha, Ruot khawm a nih ti hi a hming ringawt khawm hin fie êm êmin a mi târlang pêk a nih.
(ii) Ṭawngbul tienga “lal’ ti thumal a umzie
Hmar ṭawnga lal ti thumal hi Sapṭawng chun Lord a na, chu chu Thuthlung Thar ziekna Greek ṭawng chun kurios a nih. Kurios ti thumal hi a zawmpui Kuros a inthawka hung suok a ni nâwk a, Kuros umzie chu thilthawthei, hrât le thunei tina a nih. Kurios umzie tak chu mi thilthawthei, mi hrât le ka chunga thuneitu tak tina a nih. Thuthlung Thar hin Pa Pathien hril nâ’n a hmang a (Lk. 2:29; Tt. 2:24; Tp. 6:10); chun, Krista (2 Tim. 2:21; 2 Pet. 2:1; Juda) le mihriem hotuhai (e.g., 2 Pet. 2:18) hril nân a hmang bawk. Chu khêlah, Kurios hi mihriem inlaichinna chi tum tum hrilna le inzawmin hmang a ni bawk – Pu (suok neitu) in a suok chunga thuneina (Kol. 3:22), a nuhmei chunga pasal thuneina (1 Pet. 3:6), sinthawtu chunga a pu inlalna le thuneina (Lk. 16:3,5), naupa chunga pa thuneina (Mt. 21:30) hai hrilna khawmin a hmanga. Chun, Pilat khawm, Rom lal khawm “Pu” (Kurios) tiha ko an ni bawk (Mt. 27:63; Tt. 25:26). Hieng inlâichinna târlanga um hai a hin, “lal” chu thuneina neitu a ni leiin suok, nuhmei, sinthawtu, nâupa le mipuihai chun an chunga thuneitu thuneina hnuoia inpumpêk le an thuzâwm chu an thaw ding hrim, an rawngbâwlna âwm hrim a nih ti chu a mi sukchieng pêk a nih. Lal tieng panga inthawk chun amain a va phût fâwm ni loin a lal nina in a phût a na, a hnuoia umhai tienga inthawk chun an van tuklût fâwm ding ni loin an nina in a phût hrim a ni bawk a nih.
Chun, Kurios hin neitunina (ownership) khawm a kâwk sa hlak a nih, a san chu dânnarânin an chunga thuneitu tak nina ei nei thilhai chu a neitu ei nina le inzawm a lo ni hlak (Lk. 19:33; Mt. 20:8). Mani ta khawm ni ta lo, “Mana inchâwk” a thisena a min tlan ei ni leiin Isu hi ei chunga lal tak a ni el chau niloin a mi neitu khawm a nih. Hril dân danga hril chun Isu Krista hi ei puma mi neitu a ni leiin ei chunga lal tak le thuneina po po neitu a nih. Hi thutak hi “Isu Krista chu lal a nih” ti a hin an phûm tlat a nih. (1 Kor. 6:19-20; 1 Pet. 1:18-19).
Krista chu “suok angin an siem a, ama le ama an suktlâwm” leiin Pathienin nasataka a chawimawinaa “hming po poa hming chunghnungtak a pêk tah a,” a ti chu Kurios – Lalpa hi a nih. Hi hming hi a Mihriem – Pathienna, achunghnungtaka thuneitutak a nina le hnuoi le vâna laltak, thilsiem chitinrenghai ibiek ding chu a nih ti a sukchiengna a nih.
(iii) “Lalhai Lal le hotuhai Hotu” (Tp. 17:14; 19:16)
Isu hming le nina (names and titles) tam tak Biblein a mi hril pêk a, chuonghai laia pakhat chu, “Lalhai lal le hotuhai Hotu” (King of kings and Lord of Lords) ti hi a nih. Bible pumpuia hin hi ṭawnglamkei (phrase) hi vawi ruk lai hmang a na, Isu lal a nina thu hril nan ṭum hni hmang a nih (Tp. 17:14; 19:16). Isu nina hi king le lord tiha hril kawp a ni phâ ei Hmar Bible hin lal le hotu tiha inlet hlak nisienkhawm hienga hril kawp a ni naw chun King a khawm lal, Lord a khawm lal ti hi a hmang tlângpui, entirnân – “Judahai lal (Basileus-King) hung pieng chu khawlâm a um a?” (Mt. 2:2). “Vawisûn hin in ta dingin David khuoah Sandamtu a pieng tah, Lal (Kurios-Lord) Krista chu.” (Lk. 2:11) “Lalpa, (Kurios-Lord) i nuom chun i mi sukthieng thei” (Mt. 8:2). Chuong ang bawkin Mt. 8:25;15:25; Jn. 20:28; Tt. 2:36; 10:36; Rom 10:9 a hai khawm hin Kurios-Lord-Lal tiha inlet vawng a nih. Chuleiin, ei thupui “Isu Krista chu lal a nih” tiha lal ti thumal hin lal (king) le hotu (Lord) huom ve veng a ta. Lal (king) chu thuneitu a na, hotu (Lord) chu neitu a na, Isu Krista hi ei chunga thuneina po po neitu le a mi neitu a ni bawk leiin Lal tiha ei ko hin hieng thutak hai hi a fûn khâwm vawng a nih. Hnuoi le vânah, thilsiem chitin rênghai siemtu le neitu le an chunga thuneina chunghnungtak neitu, “Lalhai lal le hotuhai Hotu” chu Isu Krista hi a nih.