Independent Church of India, 176th Executive Council chu August 5-7, 2026 sung khan Council Hall, ICI Secretariat, Sielmat ah hlawtlingtaka nei a nih. Hi huna hin Presbytery 15 le City Church 2 a inthawk Council palai fekhawm a nih.
Hi Council hi Upa Dr. H.L. Liensang (Chairman), Rev. B.L. Sandam (Vice Chairman) le Rev. Lalneikhup Hmar (Secretary) ṭhuoinaa nei a nih.
Ni thum sung hin Council chun kohran enkawlna, rawngbawlna le hma tieng fe pei dan ding thu tamtak a ngaituoin a rel a. Secretary danghaia inthawk report le department resolution-hai tiema ngaithlakna le pawmpuina nei a ni bawk.
Pastor rawngbawlna thuah, Mission Field tienga pastor rawngbawlna sukhratna dingin hma a laka, Presbbytery pahni enkawltu dingin Presbytery Secretary thar Pastor pahnih a ruot bawk.
Kohran mamawnahai, hieng biekin bawlna le project sukhratna ding thuhai le kum thar chena development thila kohran hma lak dan dinghai khawm a ngaituo bawk.
Sum enkawlna thuah, financial regulation, allowance, pension le Pathien ram sum feltaka enkawl ding thu ngaipawimawin, ro ṭhenkhat chu a ṭul anga General Assembly chena intlun dingin a rel.
Bible inchukna le rawngbawlnaa training thu khawm Council hin ngaituoin, Pathien thua Extension Studies khawm hma la dingin an singsa.
February 22-March 1, 2027 sunga Rengkai hmuna 77th General Assembly neina ding le inzawmin hmang dan ding tlangpui a siema. A famkim lem chu Moderator le ICI Secretariat Meeting-in an la siem dingah a sie.
76th General Assembly (2025) khan ICI Constitution le By Law review dingin a rel angin, Department le project tinin By Law revision an lo thawa. Constitution thuhai khawm biel tinah ‘circulation’ khawm lo thaw a ni angin, hieng simthar le thlengdanglam dinga biela inthawka thulut umhai chu Council hin a ennawn a. Hun indainaw leiin, a rengin en hman naw sienkhawm Executive Council nawka en zo ding le General Assembly chena intlun dingin a rel a nih.
Kum 2027 kuma Kohran Kum Thupui dingin, “Inremna le Inpumkhatna” (Unity and Peace), Ephesi 4:3, Ministries Board in a siem chu a hrietpui bawk.
Ni thum sung hin zingkar 7:00 a inthawk zantieng 5:00 chen ro rel a ni hlaka, zingkar bu po chu a hmunah fak hlak a nih.
Council tawpnain, Pathien kuomah lawmthu hrilna le Pathien umpui peina hnina neiin, ṭawngṭaina nei a nih.
