(i) Sandam ei ni leiin ei inpumpêk a nih (Rom. 12:1-2; Rom. 6:13)
“Puhai, sandama um dingin ieng am ka thaw ding?” ti indawnna hi inchûktirna indiklohai, entirna dingin Jehovah’s Witnesses chun, “Ama hmangaia a thu izâwm chun chatuon hringna lampuia ṭhuoi a ti che,” tiin an dawn hlak (The Truth that Leads to Eternal Life, p. 26). Chanchinṭha misuol kuoma puonga um chu: Krista inlana hnuoia inpumpêk rawh! A thupêkhai zâwm rawh! Thil dang po pohai nêkin Pathien hmangai rawh! I thil nei po po mâksan vawng rawh! a thuneina hnuoia intuklût rawh! tihai hi an nawh. A dawnna indik tak chu, “Lalpa Isu ring la, chuongchun sandamin um i tih,” ti a nih (Tt. 16:32). Mihriem thuawina leiin thlarau pakhat khawm sandamin a la um nawh, um khawm a um thei bawk nawh. Ei insiengna hrima, “âwi naw nâuhai,” (Eph. 2:2) le Pathien dân lo dotu le zâwm theilo ei nih (Rom 8:7).
Isu Krista ta dinga ei inpumpêkna chun a mi sandam nawha, lunginsietna zara ringnaa sandam ei nih. An lalna hnuoia kan tuklûtna chun a mi sandam nawha, lunginsietna zara ringnaa sandam ka nih. A thupêkhai ka zâwm lei a sandamna chang ka ni nawha, lunginsietna zara ringnaa sandam ka nih. Isu ka hmangai leia sandam ka ni nawha, lunginsietna zâra ringnaa sandam ka nih. Ka umdân ṭha le nungchang mâwi chun a mi sandam nawha, lunginsietna zâra ringnaa sandam ka nih. Pathien lunginsietna sandamna chu Lal Isu Kristaa chau hmu thei a nih: “Nâupa neitu chun hringna chu a nei a, Pathien Nâupa nei nawtu chun hringna chu a nei nawh.” (1 Jn. 5:12) I beisei hringna chu Krista thisen le a felnaa an nghat am nanga thilthawa? Hla siemtu chun, “Khawvêl mawina ka ring ngamnawh, Isu hming ringsan chau naw chu,” a ti a nih. Ei ngirna chu mani inpumpêkna ṭieu dup, pil hmang el dinga ni loin Krista Lungpui nghetah ni lem ngei raw se.
(ii) Sandam ei ni leiin suol ei nghatsan a nih (1 Pet. 2:24: Mt. 21:28-29)
Mihriem suola tlu ta hnung, nina suol le suol thaw mizie nei ta hnungin thilṭha a hung thaw nâwk theina ding chun thil siemthar hung ni phawt ding a nih: “Tukhawm Kristaa um chun thilsiem thar a hung ni ta a,” (2 Kor. 5:17). Sandam ei ni theina dinga ei thaw ding chu Lalpa Isu Krista ring hi a nih (Tt. 16:30-31). Mihriem chu ama thu in thilsiem thar a ni el thei nawh. Misuol chun suol a nghatsan thei nawh. Suol nghatsan hi lunginsietna zara ringnaa sandamna ra a nih; in sandamna ding a ni nawh. “Ethipoia mi chun a vun chu a thlengin, keite khawma a zie chu a thleng thei am a nih? Thil ṭhanaw thaw ngaia hmanghai hin thil ṭha chu in thaw ding am a nih?” (Jer. 13:23) Ethiopia mi chun a vun rawng a thleng thei nawha, keite khawma a zie a thleng thei naw ang bawkin misuol (piengthar lo) suola um, suol mizie puta insieng chun thil ṭha a zuk thaw el thei nawh. A suol nghatsanin (turning from sin) Krista inlalna hnuoia an tuklût thei nawh.
Simna (repentance) hi sandamna dinga ṭul le pawimaw a nih. Ringna le simna hi ṭhe hran thei an ni nawha, tangka thir hmai pahni nei ang hi an nih. Chuleiin, Peter chun sima sandamna chu chang dingin ama ngaithlatuhai chu a fiel hrim a nih (Tt. 2:38). Amiruokchu, ringna le suol simnahai hi thuhmun ruok chu an nawh. Chuong ang bawkin, suol thaw insir le suol nghatsan hai hi simna le inzawm chu an nih, amiruokchu, simna hrilfiena ruok chu an ni chie nawh. Biblea simna indik tak chu lungril inthlâk or lungril inthleng (change of mind) a nih. Suol le Isu Krista chungchanga a lungril lo put dânhai chu thlenga, Isu chu “Lal le Krista a nih” ti lungril a hung nei lem na chu a nih (Tt. 2:36). Chun, Bible bawkin simna indik chun râ – nungchang inthleng, suol nghatsan (turning from sin) an suo ding a nih tiin a min chûktir a nih (Lk. 3:8-14; Tt. 3:19). Suol simna chu lungril inthleng a na, suol nghatsan chu nungchang inthleng a nih. Suol nghatsan chu simna ni loin simna ra a nih. Hi thutak hi Matthai 21:28-29 hin chieng takin a hrilfiena a mi pek a nih: “Mi tuin amanih naupasal pahni a nei a, pakhat kuomah chun a va fe a, “Ka nâu, vawisun grêp huonah sin va thaw rawh,” a ta. Ama chun, “Ka nuom nawh,’ a ta, a dawn a, nisienlakhawm, a nakie chun a lungril an thleng a, a fe ta a.” Chun, Isu ruola misuol an hemde ve pahnihai khawm khan a tir chun Isu kha hmusittakin an hnâwl vê vê a nih: “Suomhmang an hemde vehai khawm chun chuong ang bawkin an ti el ve a,” ti a nih (Mt. 27:44) Nisienlakhawm, a pakhat lem chun a lungril a thlenga, a suol hre in a sim a nih (Lk. 23:40-41). Lungril inthleng (simna) chun suol nghatsan (nungchang inthleng) a ra suok a nih. Chuleiin, sandam ei ni leiin suol chu nghatsanin Krista inlalna hnuoiah ei intuklût a nih.
(iii) Sandam ei ni leiin ei tuor a nih (1 John 2:3-5; Tt. 14:22)
“…Isûn a inchûktirhai kuomah, Tukhawmin mi zui a nuom chun, mani inhnâwlin, a kraws pûtin mi zui raw se,” a ta (Mt. 16:24). Hi thupêk hi ringtuhai chun ei ngai pawimaw hle nîn an langa, hril khawm a hlaw êm êm. Amiruokchu, thupêk le inzawm hin thutiem danglam tak el khawm a um bawk a nih: “Ngai ta u, satene laia berâm um angin ka tir cheu hi…rorêltuhai an inmantir ding cheu a ni sih a, inkhâwmna inahai vuong an ti cheu a; anih, hotuhai le lalhai hmaah annihai le Jentailhai inhriettirna dingin, keima leiin ṭhuoi an ti cheu,…Keia hming leiin mi po po theida ning in tih,” a ta (Mt. 10:16-18, 22). Johan 15:19-20 a chun, “…Khawvêla mi in ni si nawh a, khawvêla inthawka ka thlang suok lem cheu leiin, khawvêlin a theida cheu a nih… Annin kei an mi suknawmna ta chun, nangni khawm suknawmnâng an ti cheu,” tiin ip nei lovin thutak chu a mi hril pêk a nih. Chuleiin, Krista inlalna hnuoiah intuklûta, a thupêk zâwm tuhai chun sukrinumna an tuor ngei ding a nih. Tuorna hi insandamna ding ni lovin sandamna changtuhai ta dinga thutiem, sandamna râ a nih. Nisienlakhawm, ringnaa ei puitling dân le thlaraua ei sip dân an ang seng naw leiin chi tum tumin ei lo dawngsâwng nâwk ta hlak a nih. Lungsen êm êma tuor pâwl ei um a (Entirna dingin, Jona), nuor ngâwi ngâwi a tuor khawm ei um bawk a (Entirna dingin, Elija), chun, lâwm taka zuitu ei um bawk a nih (Entirna dingin, zirtirhai). Bible ruok chun ei rêngin zirtirhai anga lâwm puma tuor dingin a mi dit leiin, “Lâwm pumin Lalpa rawngbâwl unla,” tin a min fûi a nih (Sam 100:2).
Sandam ei ni ta si chun ei Lal Isu chu phûr le thafântakin, lâwm pumin ei zui ding a nih. Chu chu an lalna hnuoia intuklût dân indiktak chu a nih. Isu ngei khawmin, “lâwm unla, nasatakin hlim ro,” tiin a min fûi hrim a lo nih (Mt. 5:12a). Iem ei lâwmna ding san? “Vânah in lâwmman a um râwn sih a,” a ti a nih (Mt. 5:12b). Zirtirhai khan iengtin am an ngai a? Laltak Isu thupêk zâwmna chu sukrinumna le inzawm tlat, pumpêl thei lo ding a nih ti chu an chieng êm êma, chuongchun, “Rinum tamtak tuorin Pathien ramah ei lût ding a ni hrim a nih,” tiin inchûktirhai lungril an sukdet a, ringnaa chun um um zing dingin an infui a,” (Tt. 14:22). Chuleiin, anni ngei khawm in lâwm pumin an tuor thei a lo nih: “Chuongchun, rorêltuhai laia inthawk chun an suok a, chu hming leia muolphona tuor tlaka ruot an ni leiin an lâwm hleh a,” ti a nih (Tt. 5:41).
Ei Lalpa Isu hi iengtinam ei zui ve a? Lungsen pumin? Nuor pumin? Lawm pumin? An lalna hnuoiah indiktaka ei intuklût chun rinumin um ei ta, amiruokchu, sukrinumna chun lâwmman a râsuok ding a nih. Rinum ei tuorna hi insandamna ding ni lovin, vâna ei lâwmman ding ei inkhâwlna a lo nih ti thutak hi theinghil ngai naw inla, chu chun lâwm pumin ei tuor thei ve ding chau a nih.