Independent Church of India sûnga Pastor po pohai, Pastors’ Accounts Training chu hlâwtlingtakin zo a lo ni tah. Hi training hi Phase Pahnia ṭhe a nih a. Phase khatna chu October 1-3, 2025 sûng khan Gospel Centenary Guest House chung, Centenary Archive Hall, Sielmat ah nei a nih a. Aizawl, Tuivai, Sakawrdai, Hmarbiel South, Hmarbiel North, Vangai le Tuiṭhaphai Presbytery haia Pastor po po bâkah Sielmat Bible College le ICI Secretariat a Pastor hai an ṭhang.
Phase Hnina chu October 7-9, 2025 sûng khan Ṭhalai In, Hmarkhawlien ah nei nâwk a nih a. Assam Hills, Jinam Valley, Cachar, Jiribam, Serlui, Meghalaya East, Meghalaya West haia Pastor po po bâkah Delhi le Guwahati City Church haia Pastor, Mission Field po poa Pastor hai khawm an ṭhang bawk.
Hieng training-hai hi Pu Joyful L. Ṭhiek, Finance Manager le Tv. Samuel Lalchawisang, Accountant haiin an keiṭhuoi a nih. Anni bâk a hin, Sielmat a nei hunah Sr. Accountant, Pu Alan K. Songate khawmin a keiṭhuoi bawk.
Chun, training hmun pahni a hin, rawngbawlna tienga inhrilhrietna le hriltlângna neipui an nih a. Rev. Lalrohlu, Secretary Ministries in hi hriltlângna le inhrilhrietna hi a ṭhuoi.
Training a ding hin Training Handbook buotsai a nih a. A ṭangkai êm êm.
Finance Board, ICI in Pastors Finance & Accounts Training hi kum 2025 sung hin nei nisien tia Executive Council a a put lût dungzuiin Executive Council 171/9 chun 2025 ngêi hin nei nisien tiin a hung rêl a. Chu bâwzuina chun Finance Board 162/5 chun hi training hi October 1-11, 2025 sung hin Hmarkhawlien le Tuiṭhaphaiah nei nisien tiin a rel anga hi training hi nei a nih.
